အမေ့ဂုဏ်ရည်
********
၁။သေမင်းကိုအသက်အပ်ခါ
ခက်ခဲစွာမွေးဖွားခဲ့ရတဲ့သားဦးမို့
အချစ်ပို အပြစ်မဆိုဘဲ
နို့ချိုတိုက်ကျွေး မွေးမြူခဲ့တဲ့အမေ . . .
၂။အရုပ်လိုတစ်မျိုး အိမ်သာလိုတစ်လှည့်
အသုံးပြုခဲ့ပါသော်လည်း
အပြုံးမပျက်ခဲ့တဲ့အမေ. . .
၃။ဖခင်မရှိတော့တဲ့သားကို
ဖခင်လိုတစ်မျိုး မိခင်လိုတစ်ခါ
သားလေးအားမငယ်ရဖို့
တစ်ယောက်တည်း ပြုစုစောင့်ရှောက်ကာ
ပညာသင်ကြားပေးခဲ့တဲ့အမေ . . .
၄။ဆင်းရဲ့ဒုက္ခ ရောက်နေပါသော်လည်း
ကြီးမြင်းခြင်းသို့ ရောက်လာတဲ့သားကို
အလုပ်အကိုင်ခိုင်းရန် အကြံမျှ မဖြစ်
လူလောကရဲ့ အပြစ်တွေကို ညွှန်ပြကာ
လောကအကျိုး သာသနာအကျိုး
နောင်သံသရာအကျိုး အတွက်
သာသနာတော်မှာပျော်မွေ့စေဖို့
ချော့တစ်ခါ ခြောက်တစ်လှည့်
ဆုံးမသွန်သင် လမ်းညွှန်ပေးခဲ့တဲ့အမေ . . .
၅။စာမေးပွဲတွေ အကြိမ်ကြိမ် ကျရှုံးလို့
စိတ်ဓါတ်တွေ တဒုန်းဒုန်း ကျနေတဲ့သားကို
``အောင်ခြင်း ရှုံးခြင်းပညတ်တွေနောက်
သားရဲ့မောဟအာရုံရောက်နေရင်
လောဘမီး ဒေါသမီးတွေအောက်
ဘဝပျောက်နေမှာပေါ့
လျှောက်သင့်တဲ့လမ်းကို ဆက်လျှောက်နေပါငါ့သား။
၆။သို့သော် …
အမေ့ဆန္ဒ မေ့မျှော်လင့်ချက်ထဲမှာ
သားရဲ့အောင်မြင်မှု ကျရှုံးမှုတွေ မပါဘူး
နှစ်ပေါင်းနှစ်ထောင့်ငါးရာကျော်သမိုင်းဝင်ဝတ်ရုံကို
မြတ်နိုးယုယစွာ ဆင်မြန်းဝတ်ရုံနေတဲ့
ငါးသားအသွင်လေးကို မြင်နေရတာကပဲ
အမေ့ရဲ့ဆန္ဒနှင့် အမေ့ရဲ့မျှော်လင့်ချက်ပါ-လို့
ကျေးရွာဇနပုဒ်က
သမိုင်းမဝင် အမေတစ်ယောက်ရဲ့စကားကို
သမိုင်းဝင် အမေများနေ့ အကြိုအဖြစ်
ကာရန်မညီ ကဗျာတစ်ပုဒ်လုပ်ကာ
အမေ့ဂုဏ်ရည်- အမည်သညာတပ်ပြီး
ဖော်ထုတ်ရေးသားလိုက်ပါတယ်အမေ .. .. ..
တက္ကသိုလ်စာသင်သား
